《追鹿記》
Stockholm 近年城市發展都幾快，周圍都係工程項目。但政府都堅持平衡人類需求同環境保護，一般離住宅區無幾遠都總會有樹林同自然郊野公園之類。所以間唔時都會見到野生小動物，主要都係鳥類、野兔、狐狸、小鹿之類。
至於熊呀、狼呀、馴鹿、駝鹿嗰啲唔洗膽心，一定唔會俾你喺 Stockholm 撞到。狼就慘啲，喺七十年代比人類趕盡殺絕，係近年先再有狼群由周邊國家遷徙過嚟瑞典中西部，現時總數都係講緊幾百隻。
我自己最初嚟瑞典時成日喺啲公園見到兔仔，主要係野兔但亦都見過有家兔，不過無耐之後就好少再見到兔仔。後來讀書有讀到生物氣體燃料，當時教授有提到 Stockholm 市兔滿為患，好多公園土壤結構都受到破壞。所以市政府就請獵人獵兔。之後送去燃料廠製成生物氣體燃料，再送去發電廠為城市發電供暖。聽完之後，唔怪得再無見啲兔仔啦，原來已經喺寒冬化作輕煙為我保暖。
至於我人生第一次見到鹿，係有一晚好夜先離開學校，穿過叢林路嘅時候離遠見到有三隻嘢。望真啲原來係一隻鹿媽媽帶住兩隻鹿仔，當時覺得好神奇，喺香港大嘅我點想像到行行吓路返屋企會有隻野生鹿企喺你面前。可惜當時嘅 iPhone 4 喺咁黑嘅環境下係乜都捕捉唔到。
後來有一年放聖誕新年假，嗰年雪量多，周圍都係好厚嘅積雪。我決定上屋企附近後山行吓，感受吓白色樹林。我覺得積晒雪嘅樹林係幾過癮，一來草叢同部分樹葉都枯晒，無咁多嘢擋住視線，一嘢睇穿晒。二來就係路線任你行，遇到陡峭位平時要兜路行，有雪就滑過去得啦，又唔怕撞親。
如是者行吓行吓，比我離遠見到隻鹿喎。當我向佢方向行過去時佢就唔知去咗邊，要喺樹林裡面搵出隻鹿都幾考眼力，搵咗陣都搵唔到就算數落山。
我梗係唔會咁易放棄，即刻同朋友班架生，決定第日上山打鹿。由於我無槍牌，後山亦非指定狩獵區，所以我只係借咗支長鏡拎埋部單反去打鹿。
第二日我沿返琴日行過嘅路搵，一路都無發現。終於比我發現咗堆新鮮鹿腳印，梗係一路追蹤啲腳印。
不過有時腳印會消失咗，可能啲鹿跳咗落去啲小山坡都未定。行吓行吓又比我搵返啲腳印，今次仲發現堆新鮮鹿糞，唔好問我點分新唔新鮮。
憑我獵人本能，加上斷估，啲鹿一定喺我方圓百米之內。心情開始興奮起嚟，但都要隱藏氣息以免被獵物發現。終於，為數幾隻嘅鹿群就喺幾十米外。我即刻彎低身，拎支長炮出嚟捕捉佢哋。
佢哋似乎無發現到我，於是我慢慢越潛越入。當我同佢哋距離只有十米遠時，行蹤終於敗露。
佢哋梗係即刻跑開，不過佢哋又唔會走好遠喎，拉翻開約二十米距離就會停低。我又再次慢慢潛入，今次醒水行到差唔多十米近就停低，慢慢影相。
咁影極都係靜態悶㗎嘛，所以我就行近啲等佢哋又跑走吓。就好似同佢哋玩緊撲蝶咁，佢哋一時會企定定「嚟捉我哋啦～」，但當我一行動佢哋又會跑走「唔比你捉！」。之但係佢哋又唔會走好遠㗎喎，跑幾步就停低引我再捉過。就係咁重重覆覆，我哋圍住個山頭走咗幾圈。
跟咗佢哋一陣我已經發覺佢哋唔驚人，只係會同人類保持距離，你唔行太近佢係唔會理。如果你哋有留意，好多張相入面啲鹿都會望境頭，仲要幾隻一齊望添。
查實係我認定佢哋唔驚人，就直接同佢哋揮個手交個朋友。我一揮手佢哋就會望住我，只要我同佢哋保持距離，佢哋就只會望住我唔會走。
所以我影相時就左手同佢哋揮手，右手單手拎住相機㩒快門。好鬼過癮，感覺可以同佢哋溝通叫佢哋望境頭咁。不過我發覺隻隻都無角嘅，後來佢哋會合另一群都係為數幾隻嘅鹿群，終於有隻公啦。
唔理𡀔，總算起晒佢哋底，知道呢個橫頭有邊幾隻鹿出嚟行。往後周不時都會見佢哋喺周邊嘅樹林範圍活動。放暑假我鍾意半夜入樹林踩單車，都成日撞到啲鹿。遇到姐，唔係真係炒埋去。
中五作文例牌：今次追鹿經歷令我感受到，大自然就係人類生活嘅一部分。有時同啲野生動物共享同一個空間都幾開心嘅。
最後附上小知識一個，有機會喺城市見到嘅呢種鹿叫「西方狍」，係體型較細嘅一種鹿。唔好同聖誕老人啲馴鹿撈亂呀。
Search